You are here

کائنات کی سب سے بڑی نعمت

quran and islamic books

اللہ تعالیٰ نے انسان کو ان گنت نعمتوں سے نوازا، ہم میں سے ہر شخص اللہ کی دی ہوئی نعمتوں میں چلتا پھرتا رہتا ہے، اللہ سبحانہ ہی تو ہے جس نے ہمیں دیکھنے اور سننے کی نعمت سے نوازا جب کہ بہت سے لوگ اس سے محروم ہیں اور ہمیں عقل صحت اور مال و اہل کی نعمتیں دیں، بلکہ پوری کائنات کوجس میں سورج آسمان اور زمین اور تمام مخلوقات ہیں اسے ہمارے لئے مسخر فرمایا۔ ((اور اگر تم اللہ کی نعمتوں کا شمار کرنا چاہو تو تم اسے نہیں گن سکتے ۔ بیشک اللہ بڑا بخشنے والا مہربان ہے)) ۔ (النحل: 18).
لیکن یہ تمام نعمتیں ہماری مختصر زندگی کے ساتھ ختم ہوجائیں گی، لیکن وہ نعمت جس کا ثمرہ دنیا میں سعادت واطمینان ہے اور اسکا اثر آخرت تک باقی رہتا ہے وہ ہے اسلام کی ہدایت ہے اور وہی سب سے بڑی نعمت ہے جس سے اللہ تعالیٰ نے اپنے بندوں کو نوازا ہے۔
اسی وجہ سے اللہ تعالیٰ نے اس نعمت کو اپنی طرف منسوب کرکے اسے دوسری نعمتوں کے مقابلے میں شرف بخشا، چنانچہ فرمایا : (( آج میں نے تمہارے لیے تمھارا دین اور اپنی نعمتیں پوری کردی اور تمھارے لئے دین اسلام کو پسند کیا))۔ (المائدة: 3)۔
اور اس سے عظیم نعمت انسان پر اللہ کی کیا ہوسکتی ہے وہ جب اسے تاریکیوں سے نکال کر روشنی کی طرف لاتا ہے اور اسے اس دین کی ہدایت دیتا ہے جسے اس نے پسند فرمایا، تاکہ اس مقصد کی تکمیل ہوسکے جس کے لئے اسے پیدا کیا گیا اور وہ اللہ کی عبادت ہے جس کے ذریعہ وہ دنیا میں سعادت اور آخرت میں اچھا ثواب پاتاہے ۔
اللہ کا ہم پر احسا ن عظیم اور بڑا فضل ہے کہ اس نے ہمیں خیر ا مت تخب فرمایا تاکہ ہم کلمہ لا إلٰہ إلا اللہ کا بار اٹھائیں جسے دے کر اللہ تعالیٰ نے تمام انبیاء علیہم السلام کو مبعوث فرمایا ۔
جب بعض نادان لوگوں نے یہ سمجھا کہ اسلام کو اختیار کرکے انہوں نے احسان کیا اورنبی ﷺ پراحسان جتانے لگےتو اللہ تعالیٰ نے انھیں متنبہ فرمایا کہ یہ سارا احسان تواللہ کا ہے، اس نے ان کے لیے دین کی ہدا یت کو میسرفرمایا چنانچہ اللہ تبارک وتعالیٰ نے فرمایا: ((اپنے مسلمان ہونے کا آپ پر احسان جتاتے ہیں ۔آپ کہہ دیجیئے کہ اپنے مسلمان ہونے کا احسان مجھ پر نہ رکھو،بلکہ دراصل اللہ کا تم پراحسان ہے کہ اس نے تمھیں ایمان کی ہدایت دی اگر تم راست گو ہو)) ۔ (الحجرات: 17).
تو اللہ تعالیٰ کی نعمتیں بکثرت ہیں لیکن جس نعمت کے احسان کا تذکرہ فرمایا وہ اسلام کی نعمت اوراللہ کی وحدانیت اور اس کی عبادت کی ہدایت ہے ۔
لیکن یہ نعمت ہم سے شکر کا تقاضا کرتی ہے تاکہ یہ باقی اور ثا بت رہے جیسا کہ اللہ تعالیٰ فرماتا ہے :۔ ((اگرتم شکرگزاری کروگے توبیشک میں تمہیں زیادہ دوں گا اور اگر تم ناشکری کروگے تو یقینا میرا عذاب بہت سخت ہے)) ۔ (إبراهيم: 7)۔

آسان رہنمائے مسلم

آسان رہنمائے مسلم کی ویب سائٹ کتاب "آسان رہنمائے مسلم" کا الکٹرانک نسخہ ہے۔ یہ شرکۃ الدلیل المعاصر کا ایک پروجیکٹ ہے، جسے زائد از پندرہ زبانوں میں تیار کیا گیا ہے، اور اس کے مشمولات متعدد معیاری الکٹرانک شکلوں میں موجود ہیں۔