You are here

اسلام دین حیات ہے

اسلام ایسا دین ہےجو دنیا اور آخرت کی زندگی میں توازن برقرار رکھتا ہے چناچہ دنیا ایسی کھیتی ہے جس میں مسلمان زندگی کے تمام شعبوں میں بھلائیوں کو بوتا ہے تاکہ اسے دنیا و آخرت میں اس کا بدلہ ملے اور اس پودے کو ایسے نفس کی ضرورت ہے جس میں بھرپور عزم اور سنجیدگی ہو، اور اس کا اظہار ذیل کی باتوں سے ہوتا ہے:

زمین کو آباد کرنا:

اللہ تعالی نے فرمایا: ((اسی نے تمہیں زمین سے پیدا کیا ہے اور اسی نے اس زمین میں تمہیں بسایا ہے)) ۔ (ھود: 61) ۔اللہ نے ہمیں اس زمین پر پیدا کیا اور اس کو آباد کرنے اور تہذیب و تمدن سے ترقی دینے کا حکم دیا جس سے انسا نیت کا فائدہ ہو اوراسلامی شریعت سے متعارض نہ ہو بلکہ اس کی تعمیر و ترقی کو ہدف اورعبادت بتایا یہاں تک کہ کتنے ہی سنگین حالات کیوں نہ ہوں، اسی لئے نبی صلی اللہ علیہ وسلم نے اس بات کی تنبیہ کی ہے کہ اگر کوئی مسلمان پودا لگانے والا ہو اور قیامت قائم ہوجائے تو چاہئے کہ وہ اس کو لگانے میں سبقت کرے اگر ہوسکے، تاکہ وہ اس کے لئے صدقہ ہو۔ (المسند: 2712)

لوگوں کے ساتھ ملنا جلنا :

اسلام لوگوں کو دعو ت دیتا ہے کہ وہ تعمیر وترقی اور اصلاح معاشرہ میں حصّہ لیں اور معاشرہ کے افراد سے اعلیٰ اخلاق اور ان کے ساتھ بہترین سلوک سے پیش آئیں بصرف نظر کہ وہ مختلف تہذیب اور مذاہب والے ہیں، اور یہ بات ذہن میں رہے کہ کنارہ کشی اختیار کرنا اور لوگوں سے الگ تھلگ رہنا ارباب دعوت و اصلاح کا طریقہ نہیں ہے، یہی وجہ ہے کہ رسول اللہ ﷺ نے لوگوں کے ساتھ رہنے والے، اور ان کی تکلیف کو جھیلنے والے اور ان سے غلطی ہونے پر صبر کرنے والےکو اس شخص سے بہتر بتایا جو لوگوں سے الگ تھلگ رہتا ہے اور ان سے دوری اختیار کرتا ہے۔ ( ابن ماجہ: 4032)۔

علم کا دین:

یہ کوئی اچنبھے کی بات نہیں ہے کہ قرآن کا پہلا لفظ جو نبی ﷺ پر نازل ہوا وہ «اقرأ» یعنی «پڑھو» تھا۔ چنانچہ اسلام نے انسانوں کے لیے تمام نفع بخش علوم کی بڑی تاکید فرمائی حتٰی کہ جو مسلمان علم و معرفت کی راہ میں چل پڑتا ہے وہ اس کے لیے جنت کا راستہ ہوتا ہے جیسا کہ رسول اللہ ﷺ نے فرمایا: ((علم کی تلاش میں جو شخص راستہ چلتا ہے تو اس کے ذریعہ اللہ تعالیٰ اس کے لیے جنت کا راستہ آسان کر دیتا ہے)) (مسلم 2699 ، ابن حبا ن ۔84 )۔

اسلام دین وعلم کے درمیان کسی جنگ کو نہیں جانتا جیسا کہ دوسرے مذاہب کا معاملہ ہے اس کے برعکس دین تو علم کا مضبوط ستون رہا اور سیکھنے سکھانے کی دعوت دیتا رہا ہے جب تک اس میں انسانیت کے لیے خیر کا پہلو ہو۔
اسی وجہ سے اللہ نے عالم اور معلّم کی قدر میں اضافہ فرمایا اورانھیں اعلیٰ درجہ سے نوازا، چنانچہ نبی ﷺ نے بتایا کہ تمام مخلوقا ت معلم کے لیے خیر کی دعا کرتی ہیں ۔ (ترمذی: 2685) ۔

آسان رہنمائے مسلم

آسان رہنمائے مسلم کی ویب سائٹ کتاب "آسان رہنمائے مسلم" کا الکٹرانک نسخہ ہے۔ یہ شرکۃ الدلیل المعاصر کا ایک پروجیکٹ ہے، جسے زائد از پندرہ زبانوں میں تیار کیا گیا ہے، اور اس کے مشمولات متعدد معیاری الکٹرانک شکلوں میں موجود ہیں۔